Maanta oo bishu tahay 27 June, 2009, waxaa shir Jaraa'id ku qabtay magaalada Gaalkacyo, madaxweyne Kiimiko wuxuuna shaaca ka qaaday in uusan u taagneyn xilka madaxtooyada Galmudug marlabaad balse uu xilkaas sii heyn doono ilaa iyo madaxweyne cusub oo raali lagawada yahay loo dooranayo Galmudug.

Madaxweyne Mohamed Warsame Ali, wuxuu shirkaas ay kasoo qabgaleen golayaasha xukuumadda, guurtida dhaqanka, golaha garsoorka, guddiga amniga iyo qaar kamid ah bulshada reer Galmudug, uu ka sheegay in uu muddo labo maalmood gudahood ah ku magacaabi doono guddi qaban qaabisa doorashada madaxtooyada Galmudug asagoo qeexay in 1da July 2009 ay bulshada geer Galmudug dooran doonaan barlamaan cusub islamarkaasna barlamaanka cusubi dooran doono madaxtooyada Galmudug.

Sidoo kale, madaxweyne Kiimiko wuxuu shirkaas uu maanta qabtay ku cadeeyay in sababta uu go'aankaas u gaaray ay tahay khilaafaadka ba'an ee u dhaxeeya ama dhexmaray asaga iyo Golaha barlamaanka, is-maandhaaf kaasoo u muuqda mid xal loo waayay.

Waxaan habayaraatee shaki kujirin in Galmudug loo sameeyay Dastuur waafi ah oo xilalka ukala qaybinayaa Hay'adaha dastuurigaa ee dowladda sida madaxweynaha, golaha barlamaanka, golaha garsoorka, iwm. Dastuurka loo sameeyay Galmudug sanadkii 2006 waamid ku salaysan hanaanka Dimoqaraatiga-democracy ee ma aheyn mid ku salaysan Diktidoori-dictatorship.

Haddaba, madaxweyne Kiimiko shirka jaraa'id ee uu qabtay iyo qeexidda uu qeexay hanaan siyaaso bulsheedka uu doonayo in loo doorto madaxtooyada Galmudug asagoo meesha ka saaraya Golaha barlamaanka hadda dastuuriyan jira, waa nidaam abuuraya siyaaso bulsheed fidno ah islamarkaasna Galmudug u horseedaysa mushkilado siyaaso bulsheed dib u dhac iyo khatar ku ah nabadda iyo horusocod shacabka walaalahaa ee Galmudug oo horayba ay u ragaadiyeen colaado, abaaro, jufo jufeysi, kala dambeyn la'aan, hadaf xumo, iwm.

Gunaanad, Waxaa nabad, xal siyaasadeed oo fiican iyo aragti fog noqon lahaa haddii Mr. Mohamed Warsame-Kiimiko, uu si aan arbushaad iyo xanaf siyaasadeed laheyn oga dagi lahaa xilkaas madaxweynimo oo uu hayay muddo ku dhow 4 sano. Miisaanka xagga siyaasadaa iyo aqoonta uu leeyahay Mr. Kiimiko waxay ahayd in ay ku xambaarto in uu habayaraatee Galmudug ka ilaa'iyo dib u dhac dambe oo oga yimadaa is-maandhaaf siyaasadeed, ka dulbood dastuurka iyo mushkilooyin horleh.

Anigoo cadaaladda iyo maslaxadda guud eegaya, waxaan qabaa in Mr. Kiimiko uusan datuuriyan xaq u lahayn in uu kala diro kuli golayaasha dastuurigaa ee dowladda islamarkaasna kaligii ku tagrifalikaro hanaanka doorashada madaxtooyada Galmudug iyo maareynta mustaqbalka siyaasadda Galmudug. Go'aamada siyaasadeed ee uu soo bandhigay Mr. Kiimiko watu lid ku ah dastuurka u degsan Galmudug, cadaaladda ijtimaacigaa, aslaaxinta bulshada iyo horumarkii la beegsanayay.

Waxaa nasiib daro iyo talo xumo ah in siyaaso bulsheedka Galmudug ay qaangaar noqonweydo qarnigan 21aad, dadkuna ay wali ku meeraystaan waxyaalaha haraadigaa sida jufo jufaysiga, nidaam xushmeyn la'aanta, dano shaqsi u rucleynta, wiiqita danaha guud iyo cadaaladda oo la hareermaro.

Towfiiqda Allaha waafajiyo Galmudug.


Hassan S.A.Shirwa