Hornafrik Mogadishu 12.06.2009.

Khilaafaadka u dhaxeeya mas’uuliyiinta maamul goboleedka Galmudug State ayaa sii kordhay waxyar ka gadaal markii madaxweynaha maamulkaas Maxamed Warsame Cali Kiimiko uu amar ku bixiyay inaanu laga oogi karin magaalooyinka uu ka taliyo maamulku wax doorsho ah oo loogu baratamayo qabashada xilka madaxweynaha.

Qoraal uu ku saxiixnaa gudoomiyaha gudiga garsoorka maamulkaas Sheekh Axmed Yuusuf Jimcaale ayaa maxkamadda sare ee gobolku waxa ku meel marisay go’aan cad oo qeexaya inaanu marnaba la qaban doonin doorasho dhanka madaxtimadda ah ilaa iyo inta laga gaarayo 21ka Octobar ee sanadkaan.

Horey golaha wakiiladda Galmudug waxa ay u shaaciyeen in waqtiga doorashadda laga dhigo 16ka bishaan aynu ku jirno ee June taasi oo keentay in halkaasi ay gaaraan tiro musharaxiin ah.

Wararka ugu dambeeya ee laga helayo gobolkaasi waxa ay soo sheegayaan in khilaafaadka dhinaca siyaasiyiinta in uu sii kordhayo xilli halkaasi ay ku sii qulqulayaan aqoonyahano ka soo jeeda deegaamada hoostaga Galmudug.

Madaxweynaha maamul goboleedka Galmudug Mr Kiimiko ayaa ku adkeysanaya inaanu jirin wax doorashooyina oo haatan laga qaban qaabin karo gudaha maamulkaas.

HornAfrik news Mogadishu