Hay’adda Culimada oo markale ku baaqday in la joojiyo colaadda Gaalkacyo

Hay’adda Culimada oo markale ku baaqday in la joojiyo colaadda Gaalkacyo

Hay’adda Culimada Soomaaliya ayaa markale ku baaqday in si degdeg ah maamulada Galmudg iyo Puntland ay xal uga gaaraan dagaaladii ka dhacay magaalada Gaalkacyo.

Guddoomiyaha hay’adda Culimada Soomaaliyeed Sheekh bashiir Axmed Salaad oo la hadlay Radio Muqdisho ayaa tilmaamay inay tahay wax aad looga xumaado in dad walaalo ah oo hal magaalo wada degan inay ku dagaalamaan waxa aysan garaneyn, waxaana uu xusay in dagaalada nuucaani oo kale ay ka dhalan karto cawaaqib xumo, maadaama dadku ay yihiin dad xigto ah.

Sheekh Bashiir Axmed Salaad ayaa xusay in dagaalada ay sababeen in ay ku barakacaan dad maato ah oo xilligan ku dhibateysan meelo ka baxsan magaalada, waxaana uu Madaxda Puntland iyo Galmudug ugu baaqay in wax waliba lagu dhameeyo wada hadal isla markaana ay u hogaansamaan baaqyada uga imaaneysa bulshada qeybaheeda kala duwan.

“Waxaan madaxda Galmudug iyo Puntland ugu baaqeynaa inay si deg deg ah xal uga gaaraan colaadda Gaalkacyo, runtii qax baa dhacay, noloshii way istaagtay, marka waxaan soo jeedineynaa in wixii la isku qilaafsanyahay dib loo dhigo oo la raadi waddo kale oo xal lagu gaari karo, ayna u hogaan samaan baaqyada nabadeed ee ka imaaneysa qeybaha bulshada” ayuu yiri Sheekh Bashiir.