Madaxweynaha Dowladda Galmudug Oo Kulamo Addis Ababa Kula Yeeshay Madaxda Dowlada Itoobiya

Madaxweynaha Dowladda Galmudug Oo Kulamo Addis Ababa Kula Yeeshay Madaxda Dowlada Itoobiya

Madaxweynaha dowlad goboleedka Soomaaliyeed ee Galmudug Mudane Cabdikariim Xuseen Guuleed iyo wafdi uu hogaaminayo oo maalmahaan casuumad rasmi ah ku joogay caasimadda Itoobiya ee Addis Ababa ayaa kulamo kula yeeshay madaxda dowlada Itoobiya.

Madaxweynaha Maamulka Galmudug waxuuu kulankii ugu horeeyay la yeeshay Wasiirka arrimaha dibadda Itoobiya Tedros Adhanom, waxayna labada dhinac ka wada hadleen xoojinta xiriirka Dowlada Itoobiya iyo maamul goboleedka Soomaaliyeed ee Galmudug oo xuduud dhinaca dhulka ah leh gaar ahaan xoojinta Ammaanka iyo Ganacsiga.

Kulankaan markii uu dhamaaday ayaa waxaa Saxaafada la hadlay Wasiirka arrimaha dibadda Itoobiya Tedros Adhanom oo sheegay inay Itoobiya muhiimad gaar ah u leedahay dowlad goboleedka Galmudug waxuuna sheegay inay aad u soo dhaweynayaan booqashada markii ugu horeysay Madaxweyne Guuleed ku yimid dalka Itoobiya.

Sidoo kale, Madaxwenaha dowlad goboleedka Galmudug Cabdikariim Xuseen Guuleed ayaa sheegay inuu kulankani ahaa mid si weyn labada dhinac isku afgarteen laguna gorfeeyay xoojinta xiriirka labada dhinac gaar ahaan Ammaanka iyo Ganacsiga.

Si kastaba ha ahatee, dowlada goboleedka Galmudug ayaa xuduud dhanka dhulka ah leh dowlada Itoobiya, waxuuna safarka Madaxweyne Guuleed ku tagay Itoobiya noqonayaa kii ugu horeeyay uu halkaasi ku tago tan iyo markii 04 July loogu doortay magaalada Cadaado.